Ceremonia e Lanҫimit për Fituesit e Skemës së Nën-Granteve

Komiteti Shqiptar i Helsinkit (KShH) organizoi ceremoninë zyrtare të lançimit për gjashtë organizatat e shoqërisë civile, fituese të skemës së nën-granteve, pjesë e projektit të financuar nga Bashkimi Evropian “Shoqëria Civile kundër Korrupsionit: Nga Sfida Vendase në Reagim Evropian”. Ky aktivitet mblodhi së bashku aktorë institucionalë dhe partnerë ndërkombëtarë që mbështesin transparencën dhe luftën kundër korrupsionit në Shqipëri.

Fjalët përshëndetëse u mbajtën nga Znj. Erida Skëndaj, Drejtore Ekzekutive e KShH-së; Z. Insidior Rexhepi, Drejtor i Përgjithshëm i Drejtorisë së Antikorrupsionit; Znj. Cinzia Tarletti, Shefe e Operacionit 1 në Delegacionin e BE-së në Shqipëri; Znj. Elida Jata, Menaxhere Projektesh në Qendrën ALTRI; dhe Z. Dharmendra Kanani, Zëdhënës Kryesor i organizatës Friends of Europe.

Gjashtë organizatat fituese — Together for Life, Akademia e Integrimit Evropian dhe Negociatave, Instituti i Kulturës Rome në Shqipëri, Qendra për Nisma Ligjore, All Green Center, dhe Instituti Shqiptar për Studime Ndërkombëtare — prezantuan qëllimet dhe rezultatet e pritshme të projekteve të tyre. Iniciativat e përzgjedhura synojnë të sjellin qasje inovatore në parandalimin dhe luftën kundër korrupsionit, veçanërisht në sektorë të ndjeshëm si shëndetësia, arsimi, prona, prokurimet publike, drejtësia për viktimat e dhunës seksuale dhe mbrojtja e grupeve të margjinalizuara si komuniteti rom.

Organizatat u përzgjodhën në një proces të hapur dhe konkurrues mes 34 aplikimeve, i vlerësuar nga panele ekspertësh të Komitetit Shqiptar të Helsinkit, Qendrës ALTRI dhe Friends of Europe. Gjatë takimit, u theksua rëndësia e forcimit të bashkëpunimit ndërmjet shoqërisë civile dhe institucioneve të specializuara në luftën kundër korrupsionit, si një hap thelbësor drejt qeverisjes më transparente, të përgjegjshme dhe gjithëpërfshirëse në Shqipëri.